مخطط بونزي

(مخطط بونزي) “Système de ponzi ”
شكون بعدا هاد السي بونزي ؟ بونزي هو أكبر محتال فالتاريخ ديال المريكان وهو مهاجر إيطالي, تزاد في 1882
كان خدام فاللول فالبريد , من بعد هاجر لأمريكا- بوسطن بالضبط سنة 1903 ديك الساعة كيفما صرح كان فجيبو تقريبا شي 20 درهم ديالنا .. حيث الباطو اللي كان جاي فيه كان فيه كازينو وهوا مع طماع ريح يقمر ومشاو ليه فلوسو كاملين .. المهم بونزي ولا كارلو (الاسم ديالو) دوز السنوات الأولى فبوسطن خدم تايغسل الماعن من بعد ولا سرباي من بعد جراو عليه حيت كان تايشفر الكليان .. من بعد 4 سنين فالميريكان مشا لمونتريال فكندا تما خدم مساعد صراف فواحد البنك ايطالي كاين تماك , ودغيا ولا مدير تاع البنك . من هنا السي بونزي تعلم و خدا الدروس حيت مول البنك كان داير للناس اللي بغاو يحطو فلوسهوم انتيري ديال 6 فالمئة و الأبناك لخرين دايرين هير 3 فالمئة .. من تما اكتشف بونزي البلان , باللي البنك ماتايدير لا اسثتمارات لا تاوزة هير تايخلص الناس بفلوس ناس خرين اللي جاو جداد وضايرة الحركة نتا واكل خبييز و لاخور واكل خبييز و البنك واكل خبييزة حتا يتقادا الدقيق .. فعلنا طاحت البنكة ودارت فاييت ومول البنك هرب للمكسيك وكيف العادة السي بونزي يستغل أنصاف الفرص و كتب لراسو شيك وزور التوقيع تاع شي واحد من المديرين وخرج الفلوس.. فاللخر قبطوه وحكمو عليه بتهمة التزوير مشا فيها 3 سنين .
دازت 3 سنين وخرج بونزي ومشا ديريكت للميريكان وبدا تايهرب الطاليانيين من الحدود وقبطوه صحاب الحال تاني وضربوه بعاماين فالحبس ديال أتلانتا ..فالحبس تلاقا بواحد رجل اعمال مشهور تشارلز مورس واللي كان أحد رجال الأعمال الأغنياء، وكان يلقب بملك الثلج في نيويورك، حيث كان يحتكر صناعته، من غير أنشطته المالية المكثفة سواء في البنوك واللي كان تايسيطر على 10 منها على الأقل، أو في سوق المال، حيث كان مضاربا كبيرا فبورصة وول ستريت. من هنا تعلم بونزي التخلويض وداكشي
السيهوم بونزي خرج وتزوج (مبروووك ههه بكثرت ماتانعاود عليه ولا من العائلة 😂😅) المهم تزوج وحل واحد الحانوت تاع تابقالت تايبيع العطرية وداكشي دار عقلو زعما شوي بشوي طاحت عليه فكرة أنه دير شركة ديال الاعلانات فلي كاطالوغ بحال الشكل تاع الباج جون Yellow pages ماصدقش ليه البلان ومانجحش ليه داكشي .. بعد سيمانة صيفتات ليه واحد الشركة اسبانية على ود الكاتالوغ و مع الرسالة كان كوبون باش يجاوبهوم فرسالة .. اللي ماعرفش اشناهو كوبون هو واحد الكود ولا شي جالوقة صغيرة يمكن ليك تقبط مقابلها فلوس او خدمة ولا تتنقص ليك من الثمن , تاتكون عندها قيمة .. غادي يستعملو فبلاصت التامبر ولا لي فخي اللي غايخلص فاش يبي يصيفت الرسالة .. وهنا بونزي لاحظ باللي الكوبون تاتختلف قيمتو من بلاد لبلاد هيا هاديك مشا شراهوم من الطاليان رخاص وبدا تايبدل فيهوم بالطوابع البريدية وبدا يبيع فيهوم ربح زبالة تالفلوس يعني بزاااف وصل الربح حتال 400 فالمئة اللي هما أرباح خيالية , من بعد قالها صحابو والعائلة تاعو وبغاو يدخلو معاه شركة وبداو بصيفتو ليه الفلوس وهوا تايستتمرهوم فاديك الهمزة اللي طاح عليها وواعدهوم باللي بعد 90 يوم ياخدو الارباح ديالهوم بالفعل داروا اللعاقة وواحد تايقولها لواحد : ( تايقولو اه الشركة الفلان الفلانية ها أش دايرا واربحت معاها أعشيري ..هادي فالماركوتينغ تاتسمى technique bouche à oreille) المهم واحد يوصل لواحد وتشهرات القضية حتى ولاو مسثتمرين معاه الألاف الناس تاتبيع ديورها باش تربح كثرة وتشري فيلا من بعد (هههه واخ هانتا تاتسكن فيها) وحيت السيستيم تبونزي مامبنيش على عملية استتمارية داكشي هير الخوا الخاوي بدات تاتأزم الوضعية ورجع السي بونزي للقضية اللي كان تايدير مول البنك تايخلص الناس بفلوس الناس الجداد … من بعد رجال الاقتصاد والصحافة بداو يشكو فالدخل ديالو , منين جاوه الفلوس كاملين .. ومعا ضوسيه موسخ زاد كثر الشك و عاقوا بفعايلوا الاحتيالية وكيفاش تاينصب على الناس وتاهوما ماعطلوهش و صيفطوه 13 عام تالحبس 🤗🤗
كيفاش تايخدم هاد المخطط ؟
السيستيم كيفما شرت فالاول بكل بساطة واحد تايجيب فلوسو باش يستتمرهوم وفاللخر تالشهر غادي يقبط الارباح اللس بونزي تايقبط دوك الفلوس تايخشيهوم فجيبو وفاش تايجي اللي هذاك اللي استتمر فلوسو ياخد الارباح تايعطيه من فلوس مسثتمر جديد ودايرة الحركة … غادي يجي واحد من هاد الشركات اللي قلنا وغادي يقول ليك لا بونزي كان هير تايقبط الفلوس حنا تانستتمرو فواحد المنتوج تانبيعو مثلا الغاسول .. أه مزيان ومنين تايبيعو الغاسول مالهوم مايحطوه ديريكت فالسوق لاش تايبعوه بهاد الطريقة , الجواب باين حيت البرودوي حشيا و دايرينو هير باش يغطيو ويبان داكشي قانوني و تايبيعوه للمنخرطين صحة وبالتالي هما ماتايتباعش ليهوم وتايبقا حاصل فيهوم .
من اللخر بونزي تايعتامد على عناصر وهمية بحال استتمار ساهل ماهل تايقول ليك شري دار بثمن الكرا وربح ارا 100 درهم وربح 200 درهم …
كذلك السمية تاع الشركة تاتكون فشكل تاتجبد بنادم وهاتدشي داخل فالتسويق كيفاش تدير شي سمية تدوخ بيها بنادم بحال السعد ولا الفائز ولا نيت learn & earn زعما قرا وكسب نتام ماحدك تاتقرا تاتربح فليسات ..فلوس المنحة سير عطيهوم ليهوم
في الأخير راه شحال من بونزي داز فالعالم وانهار وماتاتدوز فترة قليلة حتى يبان بونزي أخر ولا نيت هو بسمية خرى .. 😉
بكلافيي : Saad Benbakka