Conseil pour passer votre examen

السلام عليكم أصدقائي صديقاتي 💙

تانتمنى تكونو دوزتو الأيام الأولى من رمضان مزيان 💙

المهم نظرا أن هادي فترة الامتحانات قررت نكتب منشور نشارك فيه بعض النصائح و التقنيات لي يعاونوكوم فالمذاكرة. 💯

أول حاجة برمج عقلك على الأفكار الداعمة ماشي العكس.. العقل البشري راه عندو إمكانيات خارقة خسك غير تعرف تخدمو أما إلا عمرتيه بالأفكار السلبية غادي تحد من القدرات ديالو.. و فيك أتجي.. لذا داك الهدرة ديال مانقدرش نحفظ وانا صايم, مانقدرش نخدم وانا فاطر.. إلخ. زولها عليا لأنك غالبا العام كامل و العطل كاملين لي دازو ضعيتي الوقت و جمعتي الخدمة دابا ما راكش فموقف لي تخدم فيه بالفشوش.

ثاني حاجة التنظيم التنظيم, الصيام تايأثر متافقة معاك ولكن إلا وفرتي لراسك محيط مقاد فين تاتبريباري و قاديتي وراقك ودفاترك و ملفاتك فالحاسوب.. راك غادي تسهل عليه المهمة و الوقت و الجهد لي غادي يدوزو باش يلقى واحد الدرس تالف راه يخرج فيه تمرين.

ثالث حاجة استخدام تودو ليست و برنامج يومي.. أنا جربت نخدم بلا بروغرام نهار واحد دوزتو كامل وانا تانخدم و فنفس الوقت لقيت راسي مادرت والو. هادا هو الغلط لي تايطيحو فيه بزاف ديال الطلبة تاتلقاه ديما خدام وفالتالي تايقولك خدمت حتى طبت و ماجبتش مزيان.. لا ماشي هكاك را الخدمة فيها و فيها.. فواحد الكتاب سميتو ديب وورك تايقسم الكاتب الخدمة لجوج دالأنواع :

1- شالوو وورك و هو لي تانديرو تقريبا ديما.. فاش تاتكون تاتخدم ونتا مكونيكطي ولا تاتاكل .. و هادا تايخسك دوز فيه بزاف دالوقت باش تحصل على نتائج قليلة و الإنتاجية فيه تاتكون ضعيفة.
2- ديب وورك هو لي الجودة ديالو طالعة و غير شويا منو فالنهار كافي باش تصايب داكشي لي باغي ,هاد النوع تايخسك تركز فيه على حاجة بحاجة و تفادى المشتتات.

باش تقدر تآكتيفي المود ديال الديب وورك خاسك أولا تحط لائحة المهام لي غادي تخدم عليهوم كل نهار. و كل ما كنتي دقيق كان أفضل.. فعاوط غادي نخدم الكونطا حدد الجزء بالضبط أو التمرين لي غادي تصايب.. من بعد غادي تحط حداك 24 ساعة ديالك و تزول منها القراية, الصلاة, الأكل, النوم, .. داكشي الأساسي كامل لي عندك فالنهار و غادي يبقالك وقت فراغ هو لي غادي تقسم فيه داك المهام ديالك. و حاول تخدم تقنية البومودورو لي كنت دويت عليها من قبل.

رابع حاجة ماتخدمش بالبروغرام ديال شي حد آخور شوف الوقت لي تايكون عندك فيه نتا الجهد و التركيز طالع.. مثلا من مور السحور خدم 2 ساعات , من بعد مادخل من المدرسة نعس ساعة و نص و خدم شي حاجة علاما تأذن, من بعد الإفطار بساعة ونص على الأقل خدم عاود, ما بين العشاء و السحور حتى هو وقت مناسب.. المهم نتا شوف الوقت لي مناسبك و الوقت لاخور خصصو للنوم.

خامس حاجة الناس لي تايبريباريو آون غروب اختارو مزيان معامن غادي تخدمو.. لي فيه الهدرة بزاف ولا التفلية ولا سلبي ولا معطل بزاف تفاداوه و إلا كنتي نتا واحد من هاد النوع خدم راسك حسن.

سادس حاجة و عندها علاقة بلي قبل منها.. تعلمو تقولو “لا” .. لي غادي يضيع ليكوم وقتكوم ولا الطاقة ديالكوم ماعندكوم ماديرو بيه.. نهار الفرض حتى حد مغادي يعقل عليك وحتى إلا وراك شي حاجة غادي تكون غير خضرة فوق طعام لذا اعتمد على راسك عاون الناس لي باغين يقراو على راسهوم و لي غادي يعاونوك تزيد القدام تانتا.. لي باغي يتفل فالقهاوي الله يعاونو.

سابع حاجة.. الناس لي عندهوم امتحانات المراقبة المستمرة و عاد الامتحان الفينال حاولو تخدمو عليهوم بجوج.. مثلا عندك 5 ساعات مفرقة فكل نهار .. فيكسي 3 ساعات تخدم فيهوم للامتحان النهائي بالبروغرام ديالك.. و 2 ساعات كل مرة غادي تراجع فيهوم المادة لي عندك فيها الامتحان قريب.. باش ماتخربقش.

ثامن حاجة شوفو شي حاجة لي تاترتاحو فاش تاديروها و خصصو ليها وقت ولو قليل فاليوم باش تكسرو الروتين ديال المذاكرة.. رسم, قراءة كتب, مشاهدة فيديوهات, غيمز, المهم حاولو ماتعداوش ساعة فيها باش ماتوليش مضيعة للوقت.

المهم هادشي لي على بالي هاد الساعة إلا كانت شي حاجة جديدة دابا نشاركها معاكوم 💙 طاغيو صحابكوم يستافدو معاكوم و بالتوفيق 💙

#Houda_Salamat