التسويق العصبي.. مقال مفيد وملخص..

#اجي_تفهم_CB

واحد العام في امستردام، الناس لي مكلفين بواحد المطار تما كتاشفو على ان طواليطات (حشاكم) ديال المطارات كيتوسخو بزاف، وأكبر نسبة في الاتساخ كانت بسبب تسرب البول ديال الرجال والدراري الصغار، عياو مديري المطار يلقاو حل لهاد المشكلة لانه مشكل كبير بحيث ان المطار هو اول حاجة كيشوفها السائح، الى كان مزيان فهو كيكون خدا فكرة مبدئية زوينة على المدينة، والعكس صحيح، المهم واحد الشخص سميتو Klaus Reichardt قتارح عليهم اقتراح غريب هو انه يرسمو دبانة في المرحاض، وهكا غايوليو المستخدمين قادرين ينييشو مزيان، في محاولة لقتل الدبانة… الفكرة واخة مضحكة وغريبة الى انها نقصات من نسبة الاتساخ ب 80 في المئة … الفكرة صراحة مجاتش ببساطة، ولكن من وراها دراسة معمقة لعلم الاعصاب، هاد العلم لي مختص بدراسة الدماغ ديال الانسان، بحيث انه من الممكن تغير من قرار شخص ما الى كنتي فاهم كيفاش الدماغ ديالو كيخدم… هادشي لي دارو شركات باش يبيعولك شي حاجة لي ربما انت اصلا مامحتاجهاش، وهادشي لي كيتسما بالتسويق العصبي.

هاد التسويق العصبي هو عبارة على واحد العلم الهدف منو هو استغلال نقاط الضعف في الدماغ ديال الانسان، باش نقدرو نبيعو ليه اي حاجة … وبالتالي فهاد العلم كيجمع بين علم الأعصاب neursciences وعلم التسويق marketing.

بسبب المنافسة وكثرة الخيارات، ولا من الصعب على الشركات انهم يبيعو، وبالتالي التسويق التقليدي مبقاش خدام خصوصا في الدول المتقدمة، ولا مفروض عليهم يدخلو للدار ديال الزبائن المحتملين، ومن بعد ولات هاد القضية مواكلاش ولا من الضروري انك دخل للعقل ديال الزبون وتفهم كيفاش كيفكر، ومن بعد داكشي ولاو كيفكرو فكيفاش يخليوك توافق على شراء المنتج لانهم قراو على الدماغ ديالك وعارفين كيفاش كيخدم، التسويق التقليدي كينطلق ديما من الحاجة ديال الناس، مثال نتا ساكن فمدينة لي فيها الشتاء ديما، وخاصك مظلة، حنا كنصايبو ليك مظلة، ونعرضوها عليك اكيد اتشريها، لانك كتعاني ومحتاج ليها، اما في التسويق العصبي فكنقدر نبيع ليك اي حاجة لي ممكن مامحتاجوش اصلا، لانني عرفت نوصل لواحد المنطقة مهمة في دماغك ولي هي reptilian brain …

باش نحاولو نفهمو هادشي، بشكل سطحي طبعا حيت مايمكنش نشرح ليك علم الأعصاب فبوسط، الدماغ فيه 3 ديال الاجزاء، كاين ال neocortex وهو لي كيكون في الاعلى وهدا جزء عقلاني من الدماغ كنخدموه ملي كنكونو محتاجين نفكرو بشكل عقلاني بحال مثلا فاش كتبغي تحل شي مسألة رياضية، الجزء الثاني هو ال middle brain وهو جزء كاين في الوسط وكيكون emotional كيخدم فالوقت فاش كتشوف شي حاجة كيوت ولا شي حاجة كتطلب منك احساسك، والثالث والأخير هو reptilian brain وهو المسؤول على قرارات الغير عقلانية لي كنتاخدوها، هاد الاخير هو أضعف جزء في الدماغ ولي ممكن تلعب بيه كيما بغيتي وتخلي مولاه يشري عندك اي حاجة ولو “حجرة”، ملي كتاشفو الناس لي متخصصين في علم الاعصاب ان ال reptilian brain هو افضل جزء في العقل ممكن الشركات يستهدفوه باش يبيعو شي حاجة، حاولو يفهمو شناهوما الحالات لي كيتحرك فيهم هاد العقل باستخدام التكنولوجيات بحال MRI، ولقاو 7 ديال الحالات :

– قبل وبعد : هاد القضية كتأثر بشكل كبير على reptilian brain اي انه في الحالة فاش كتوريه كيفاش كنتي وكيفاش ممكن تولي من بعد متستخدم المنتج او الخدمة ديالنا.

– الأنا : هاد الجزء من الدماغ اناني بطبعو، اي انه بعض الكلمات بحال مثلا you او your كتأثر بشكل كبير عليه، بحال انك تكون داير اعلان كتخاطب فيه الزبون ديالك بشكل مباشر، هنا ال reptilian brain كيخدم.

– الملموسية : فهاد الحالة الى خليتي الزبون ديالك يلمس القيمة المضافة لي غايزدها ليه المنتج او الخدمة ديالك، فهاد الحالة نفس الجزء من العقل كيخدم…

– الأول والاخير : في الافلام، المخرجين كيركزو بشكل كبير على الاول والاخير ديال الفلم، بحيث ان هاد الجزء من العقل كيركز بشكل كبير في الاول والاخير، اما الوسط فمكيهمش بشكل كبير، مع العلم ان المخرجين السنمائيين هما اكثر الناس استخداما للتسويق العصبي…

– المرئية : من بين الحالات فاش كيخدم ال reptilian brain هي ملي كيشوف شي حاجة واقعية، بحال ملي كتشوف اعلان ديال شي ولد صغير شرب الحليب ولا قادر يدير شي حوايج صعاب يديرهم اي واحد، او بحال مثلا المثال لي عطيت في بداية هاد المقال…

– العاطفة : هادي كتفكرني بواحد الاعلان كنت شفتو في فايسبوك شحال هادي، كان عبارة عن فيديو لي دار البووز، المهم الفكرة ديال الفيديو كانت هو انه واحد الشخص كيمثل على انه مدير الموارد البشرية في واحد الشركة، وانه كيدير مقابلة مع ناس كيقلبو على خدمة، وهو كيسولهم طبعا على معلوماتهم، المهم من بعد بدا كيشرح ليهم طبيعة العمل في هاد الشركة، وقاليهم بلي الخدمة لي اديرو ماغاتخلصوش عليها، وغاتخدمو فيها نهار كولو وممكن ليل كولو، وغايكونو عندك بزاف ديال المهام لي خاصك ديرهم فوقت واحد… الناس تصدمو مايمكنش هادشي شكون ايخدم هاد الخدمة ؟ في المقابل هداك السيد كيأكد ليهم بلي كاين ناس كيديروها، وعددهم كبير بزاف في العالم كولو مقارنة بناس كيخدمو خدامي اخرين، هنا الناس تصدمو وطلبو منو يقولهم شكون هوما هاد الناس، وجاوبهم بأن هاد الناس هما الأمهات … فهاد اللحظة كاين لي بدا كيبكي كاين لي تصدم كل واحد وكيفاش أثر عليه ال reptilian brain ديالو…

– الالام : فهاد المرحلة خاصك تفكر بشكل كبير في الالام لي كيعاني منو الزبون المحتمل ولي عندك الحل ديالو طبعا، يعني خاصك تقرا بشكل معمق على هاد الالام باش تكون مرتاح …
yassine aakam