الكاريزما CHARISMA أشنو هي الكاريزما و أشنو خاصني باش نكون إنسان مؤثر؟

في السينين الأخيرة بانت فمواقع التواصل الاجتماعي ظاهرة المؤثرين influencers وكل واحد كيحاول يبان على أساس أنه إنسان مؤثر لدرجة البعض أعتبرها مهنة كيترزق منها، بحث بسيط على الصفات لخاص تكون عند هذا الأشخاص خلاني نوقف عند صفة مهمة لي هي
الكاريزما CHARISMA أشنو هي الكاريزما و أشنو خاصني باش نكون إنسان مؤثر؟
الكاريزما كلمة مشتقة من الكلمة اليونانية “Charizestai” بمعنى نعمة، وهي هبة إلهية كتخلي الشخص مفضل عند الناس، وكيما عرفها frédéric Bon على أنها قوة الاغراء و السلطة بمختلف صورها لي كيمارسها فرد على جماعة معينة، و أول مرة تستعملات كلمة كاريزما في الجانب العلمي كانت من طرف عالم الاجتماع الألماني Max weber و عطى ليها صبغة سياسية ولي فسرها بأنها قدرة كيتمتع بها شخص معين للتأثير في الآخرين لدرجة أنه كيكون مركز قوة بالنسبة ليهم وبكثرة التأثير كيعطيوه حقوق تسلطية عليهم كنتيجة للقدرة التأثيرية.
الكاتب kurt w mortensen في الكتاب ديالو THE LAWS OF CHARISMA هضر على قوانين الكاريزما و لخصها على أنها كتكون من تلاتة ديال الحوايج:
الحضور الكامل : حضورك باختصار هي الطاقة لكيحسو بيها الناس فالبلاصة لي أنت فيها ، وباش يكون حضورك كامل و قوي خاصك أول حاجة ديرها هي “متقطعش الكلام” مثال جالس مع صاحبك كيعاود ليك شي حاجة وقعات ليه وأنت كتشوف فيه وكتحرك راسك بحال الا متبع معاه والحقيقة أنت كتوجد قصتك لي قريبة من داكشي لوقع ليه ومكتخليهش يكمل وكتقطعو باش تعاود أنت قصتك وهادشي سميتو “سرقة المحادثات” Conversations stealing وهي غلطة كتوقع فيها و كتخلي حضورك ضعيف، الا كنتي كديرها حاول تحكم فراسك وخلي التركيز ديالك كولو على الشخص ماشي على راسك والا كيعاود ليك شي حد شي حاجة خاصك تفاعل معاه وتتعاطف معاه والا بغيتي تحيد هاذ المشكل من الجذور ديالو خاصك تعرف علاش فالأصل كدير هكذا ، أنت كتسرق المحادثات حيت مركز على راسك و بغيتي تخلي البصمة ديالك ،واخا ،أجي نشوفو الانطباع لي خليتي؟ ضروري غادي تكون اتصلتي بشي حد من قبل ومعطاكش انتباه ديالو، باش حسيتي؟كعيتي؟ بقا فيك الحال؟ تخيل بلي هذاك هو إحساس هذاك لقدامك، داكشي علاش خاص ضروري تبين للطرف التاني بأنك كتسمع ليه ومنتابه لداكشي لي كيعاود كيفاش؟ خاص تبقى متواصل معاه بعينيك “تواصل بصري” تتجاوب معاه بتعليقات على كلامو و تحاول تسولو أسئلة فداكشي لكيعاود ليك غادي تبين ليه بأنك منتبه و مهتم بداكشي لكيعاود.
حاجة اخرى هي مهارات التواصل والإلقاء مهمة للحضور بشكل قوي وكامل ، الناس ليكتمتعو بكريزما عندهم القدرة على الحفاظ على انتباه الناس، وباش تحافظ على انتباه الناس خاصك تحاول تجنب بعض أخطاء التواصل الشائعة لي ممكن تكون كطيح فيها مثال ، كتكلم بزاف، مكاينش تواصل بصري، كتهضر بلغة ممفهوماش، كتهضر بالزربة ولا العكس كتهضر تقيييل، ولا كنحاول تعطي بزاف ديال المعلومات فوقت قصير ولا كتبين العصبية والخوف فكلامك…كولشي هادشي كيخلي آثار سلبي عند الناس خاص ترد البال منها.
ندوزو للمكون التاني من مكونات الكاريزما لي هو إظهار النفوذ و القوة:
الا كنتي مستمع جيد ومكتركزش على راسك غادي تكون شخص مقبول و محبوب واخا متكونش عندك كاريزما وباش تمتلك هاذ الصفة خاصك تبين القوة ديالك كيفاش؟
معنى القوة هنا هو الثقة بالنفس، حيت الا حسيتي بلي تايق فراسك، الناس لي دايرين بيك و بشكل تلقائي غادي يحسو بيك قوي، الثقة عكس الخوف ، الثقة هي القدرة على التعامل مع مشاعر الخوف بشكل سليم و تحاول تسيطر عليها، ملحوظة مهمة ماشي معنى انك تايق فراسك هي تبان حاس براسك و مغرور ، أش خاص دير؟ خاص تحافظ على الخط الفاصل بين التواضع و الغرور مثلا تخيل درتي شي إنجاز و الناس كتهنيك عليه الا كنتي متواضع بزايد غادي تستعمل عبارات تقلل فيها من قيمتك وقيمة الإنجاز لي درتي و غادي تخلي إنطباع للناس بلي مدرتي والو نيت، والا كنتي مغرور واستعملي عبارات التعالي بحال انا خدمت بزاف و ضربت عليه تمارة و صعيب على شي حد يدير داكشي لي درت …غادي تبان مغرور وغادي تطيح من قيمتك وقيمة داكشي لي درتي، خاصك تكون معتدل فكلامك بين البينين، مترفضش الثناء و التشجيع ديال الناس وفنفس الوقت حاول تشكر الناس لتعاونو معاك ولا دعموك ولو معنويا ، هكذا غادي تكون شديتي العصا من النص.
المكون الثالت :التعاطف ، الناس كيعجبهم يحسو بلي مفهومين و معترف بيهم ، والا قدرتي تحسسهم بلي انت قريب ليهم وكتفهمهم غادي يحسو بلي مرتاحين يكونو معاك ، وهادشي يمكن يدخلو فيه تقنيات الذكاء العاطفي (نقدرو نهضرو عليه فموضوع بوحدو) ، فاش كتحط الناس فحالة سعادة كتخليهم يفكرو فيك بشكل إيجابي ويتقبلو افكارك ووجودك، كيفاش؟ تحاول تشوف اشنو لمخبيين لداخل ديالهم، تحاول تسمع ليهم بوذنيك وعقلك وقلبك، حاول تقرا لغة جسدهم وتعرف المشاعر والعواطف ديالهم و تحسها معاهم، الا قدرتي غادي يحسو بالتعاطف ديالك و يتاثرو بيك. وحاول تكون لطيف و مرحب ديما باي واحد بدون مقابل.
اخر حاجة هي التقدير ، باش تقدر تعطي لشي واحد قيمتو خاص تكون قادر تفهم الانا نتاعو، الناس كولهم كيبغيو يحسو بالقبول و التقدير، انت الدور ديالك تدعم التقدير الذاتي ديال الناس بحالاش؟ بالشكر الصادق (لا يشكر الله من لا يشكر الناس) تحاول تقدر الحاجة ليدارو على قبلك، الشكر مكيكلف والو العكس كيحل ليك الابواب، وفاش تبغي تشكر خلي الشكر ديالك مرتبط بموضوع أو مواقف معينة باش متبانش متملق.
الكاريزما شخصية قوية، ظاهريا كتعطي فيها كثر ما كتاخد و باطنيا كتكون ملكتي شخصية قوية محبوبة و حكيمة.
السؤال هنا واش كاع هاذ الناس دابا لي فمواقع التواصل الاجتماعي عندهم الكاريزما؟

المصادر:
Weber Max. The Theory of social and Economic organization, translated by A. M.Henderson and Talcott Parsons. Free press 1924/1947, pp.328,358f

قاموس السوسيولوجيا، فريديريك لوبون، ترجمة زكرياء الابراهيمي، ص 59.

The laws of CHARISMA Kurt.w.Mortensen.