Conseils_et_Remarques
Pour_le_jour_du_Concours

السلام عليكم ورحمة الله،
نظرا لإعلان لوائح الناس للي ايجتازوا مباراة وزارة المالية، ورغم الظرفية الصعبة قلت انه من الواجب كتابة هاد المنشور..
موضوع المنشور هو يوم الامتحان،
الاخوان و الاخوات، يوم الامتحان ماشي فقط شحال عندك فالراس من معلومات حول داك الموضوع هي للي أتمكنك من كتابة الموضوع بشكل جيد.. عطيو شوية د الأهمية لمنهجية الكتابة، راه ممكن يكونو جوج د الناس عندهوم نفس الأفكار و المعلومات حول موضوع معين ولكن واحد داير un plan و مقسّم الموضوع و مقاد داكشي و الاخر هبط هبطة وحدة على الموضوع هي تايكتب ماتاتعرفو واش مازال فالمقدمة ولا وصل للخاتمة (للي أيسولني على المنهجية راه العديد من الأعضاء تلكموا عليها بشكل مفصل فالمجموعة، تجدون أسفله بعض المنشورات حول هذا الموضوع) .
لكي لا أطيل أكثر، هذه بعض النصائح في شكل نقط :
– الأهم هو الكيف وليس الكم (أربع صفحات مكتوبين مزيان أحسن من عشرة و هي الإطالة الخاوية)
– رغم ضيق الوقت، خودو شوية الوقت فالبداية و فكروا مزيان كيفاش اتجاوبو على الموضوع و رتبوا أفكاركوم (كاين للي هي تايتحط الموضوع و مع تايكون حافظ شي مواضيع تايهبط على الورقة بلا مايفكر)
– عطيو وقت كبير للمقدمة و مادوزوش عليها مرور الكرام، المصحح إلى شافها مكتوبة بطريقة مزيانة و منظمة اتشجعوا يقرا و يتسنى باهتمام شنو جاي من بعد والعكس صحيح.
– التصميم أو ال plan ضروري، يوضح هو الاخر للمصحح فين باغي توصل
– عن تجربة : العديد من المترشحين تايعتاقدو أنهم خدمو الموضوع مزيااان، و لما جاتني الفرصة نشوف أوراق التحرير تفاجئت أن العديد منهم تايكتبو مباشرة و بلا عناوين بلا مقدمة بلا خاتمة بحال إلى كاتب مقال صحفي، المرجو تفادي هذا النوع من الكتابات.
– واخا تشوف براسك ساليتي بكري (وهو أمر مستبعد هاد السنة)، ماتعطيش ورقتك و جلس شوية و عاود قرا داكشي للي كتبتي، كون متأكد أتلقا بعض الجمل او الكلمات للي خاصها إعادة الصياغة، أو خطأ إملائي…..
– منين يتحط قدامكوم الموضوع، شوفو الكلمات المفتاحية mots clés و حاولو ماتخرجوش عليهوم و قوموا بالتحليل ديالهوم، حيت كاين للي تايبالو شي mot clé و تايكون عندو فشي موضوع موجدو و حافظو وهي تايبالو داك ال mot clé تايهبط على هداك للي كان موجد للي يقدر يكون مختلف جدا عن الموضوع للي تحط، وجود mot clé مشترك لا يعني نفس الموضوع.
– الناس للي تايحفظوا المواضيع، كونو حذرين فالتعامل مع الموضوع المطروح (هوما من الناس للي تايمشيو زالقين hors sujet).
– كتبوا باللغة للي تاتقنو مزيان و للي عندكوم فيها أسلوب زوين و كذلك مافيهش أخطاء لغوية.. بالنسبة للمصححين ماكاينش فرق يعني شوفو نتوما فين اترتاحو و تعبروا بشكل سهل.
– الخ…
– وفي الاخير، للي عندو شي نصيحة أخرى من الناس للي ديجا خدامة يحطها فكومونطير باش يستافدو كتر.
– ولاتنسوا أنكم فقط تقومون بالأسباب، فالرزاق هو الله سبحانه وتعالى، للي نجح فهنيئا له، وللي لم يوفق هذه المرة، فل يعلم أنه لم يحن بعد رزقه، و رزقه آت لا محالة، فل يتوكل على الله و يعمل بالأسباب و مايكون هي الخير ان شاء الله.
الله يوفق،
أخوكم لمحمدي هشام.
ملاحظة : للي عندي قلتو، مراعاة لظروفي الصحية، رجاءا لا لأسئلة الخاص، كتبت هذا المنشور فقط نظرا لضيق الوقت،
و السلام عليكم ورحمة الله.

منشورات بعض الأعضاء للي كانت تاتهضر على منهجية الكتابة (مشكورين أصحابها) :
https://m.facebook.com/groups/789846551107091?view=permalink&id=2273963592695372

https://m.facebook.com/groups/789846551107091?view=permalink&id=2279235038834894

https://m.facebook.com/groups/789846551107091?view=permalink&id=2292605650831166

https://m.facebook.com/groups/789846551107091/permalink/2523763444382051/

https://m.facebook.com/groups/789846551107091/permalink/2875031715921887/